ຄໍາແທນນາມ
ແມ່ນຄໍາທີ່ແທນໃຊ້ຊື່ຂອງຄົນ, ສັດ ແລະ ວັດຖຸສິ່ງຕ່າງໆ ເພື່ອບໍ່ໃຫ້ລຶ້ມຄືນຄໍາເກົ່າເຊັ່ນ: ຂ້ອຍ, ເຈົ້າ, ລາວ, ເພິ່ນ, ພວກເຮົາ, ພວກເຂົາ, ພວກເຈົ້າ...
ຄໍາແທນນາມແບ່ງອອກເປັນ 2 ຊະນິດ ຄື:
1. ຄໍາແທນນາມບອກບຸລຸດ
- ບອກບຸລຸດທີ1ຄື: ຂ້ອຍ, ຂ້າພະເຈົ້າ, ພວກເຮົາ, ກູ, ພວກຂ້າພະເຈົ້າ...
ຕົວຢ່າງ: ຂ້ອຍມັກນົກ, ພວກເຮົາຂີ້ຄ້ານ, ພວກຂ້າພະເຈົ້າຮູ້ແລ້ວ, ກູຂີ້ຕົວະ....
- ບອກບຸລຸດທີ 2 ຄຶ: ເຈົ້າ, ທ່ານ, ມຶງ, ພວກມຶງ, ພວກເຈົ້າ, ພວກທ່ານ...
ຕົວຢ່າງ: ເຈົ້າກະຮູ້ດີ, ທ່ານຄືຜູ້ມີບຸນຄຸນກັບເຮົາ, ພວກເຈົ້າໄປໄດ້ແລ້ວ...
- ບອກບຸລຸດທີ3 ຄື: ເພິ່ນ, ລາວ, ເຂົາ, ມັນ, ພວກເຂົາ, ພວກມັນ...
ຕົວຢ່າງ: ລາວມັກເຈົ້າ, ພວກເຂົາບໍ່ໄດ້ມາ, ເຂົາເຈັບຕີນ...
2. ຄໍາແທນນາມບອກຄຸນນາມ ເຊິ່ງປະກອບມີ 5 ຢ່າງຄື:
+ໃຊ້ແທນຕົວໂດຍກົງເຊັ່ນ: ຕົວ, ຜູ້, ເຊິ່ງ, ທີ່, ອັນ...
ຕົວຢ່າງ: - ຂ້ອຍມັກມ້າຕົວແລ່ນໄວ.
- ເພິ່ນມັກຄົນຜູ້ເວົ້າມ່ວນ.
- ເຂົາກ່ຽວເຂົ້າທີ່ສຸກແລ້ວ.
- ເຂົາເຈົ້າເຮັດນາເຊິ່ງເຈົ້າຂອງບໍ່ເຮັດ.
- ເຮົາຢາກນຸ່ງເຄື່ອງອັນງາມ.
+ໃຊ້ເປັນຄໍາຖາມເຊັ່ນ: ໃຜ, ຜູ້ໃດ, ຢູ່ໃສ, ອັນໃດ, ແມ່ນຫຍັງ?
ຕົວຢ່າງ:- ໃຜກິນເຂົ້າໜຽວ?
- ອັນໃດແມ່ນຂອງເຈົ້າ?
- ຜູ້ໃດມາເດ?
- ລາວຢູ່ໃສ?
- ແມ່ນຫຍັງ?
+ໃຊ້ແທນນາມເຊັ່ນ: ລາງ, ບາງ, ບ່າງພ່ອງ, ຕ່າງ, ກັນ...
ຕົວຢ່າງ: - ໃນໂຮງຮຽນບາງຄົນຮຽນໜັງສື, ບາງຄົນຫຼິ້ນເກມ.
- ນາງແກ້ວບາງພ່ອງຟ້ອນ, ບາງພ່ອງຮ້ອງເພງ.
- ເຂົາທັງສອງຄົນຕ່າງກໍຮັກກັນ.
- ເຂົາສອງຄົນຕີກັນ .
+ໃຊ້ແທນຄໍານາມທີ່ຊີ້ໃຫ້ເຫັນເຊັ່ນ: ນີ້, ນັ້ນ, ຫັ້ນ, ພຸ້ນ, ພີ້...
ຕົວຢ່າງ: - ນີ້ແມ່ນແຟນຂ້ອຍ.
- ນັ້ນແມ່ນຜູ້ບ່າວ.
- ຫັ້ນຂອງເຈົ້າ.
- ພຸ້ນແມ່ນປະຕູໄຊ.
- ມາພີ.
+ໃຊ້ແທນຄໍານາມທີ່ບໍ່ມີກໍານົດແນ່ນອນ
ຕົວຢ່າງ: - ຄໍາວ່າຮັກຜູ້ໃດກໍເວົ້າໄດ້
- ໃຜກໍເຮັດໄດ້.
- ຈະຢູ່ໃສກໍຕາມ.
- ເອົາຈັ່ງໃດກະໄດ້.
3. ໜ້າທີ່ຂອງຄໍາແທນນາມ
- ຄໍາແທນນາມເຮັດໜ້າທີ່ເປັນຄໍາຕົວຕັ້ງ.
ຕົວຢ່າງ: ຂ້ອຍມັກໝາ, ລາວມັກແມວ, ເຂົາບໍ່ໄດ້ມັກປາ....
- ຄໍາແທນນາມເຮັດໜ້າທີ່ເປັນຄໍາປະກອບ.
ຕົວຢ່າງ: ແກ້ວຕາບອກຂ້ອຍ, ຂ້ອຍຮັກລາວ, ພວກເຮົາບໍ່ໄດ້ຊັງເຈົ້າ...
ເອກະສານອ້າງອີງ: ປຶ້ມພາສາລາວຊັ້ນມ2(2012), ປຶ້ມໄວຍາກອນລາວ 1991
ความคิดเห็น
แสดงความคิดเห็น